Enn af smíðum!

Ég tók mig til í gær og gerðist smiður. Það var kominn tími á að leggja dekkið kringum ferlíkið svo ég skellti mér í það með einkasyninum. Hann vinnur við smíðar og er að fara að læra í haust og ég er bara að hugsa um að skella mér í skóla með honum. Myndin hér til hliðar er af verkinu okkar, er þetta ekki fínt hjá okkur? Við vorum sko ekki lengi að þessu skal ég segja ykkur, helst að rafhlöðurnar í borvélunum tefðu verkið. Nú fáum við pásu, allavega ég, þar sem maðurinn þarf að grafa holur og steypa niður staura svo hægt sé að smíða vegg og loka á þegar fjölskyldan fer að nota ferlíkið. Ekki leggjandi á vegfarendur að sjá hana fáklædda.

Annars er allt gott að frétta, veðrið er indælt, í morgun glaðasólskin en sólarlaust eins og er. Þó er hitinn svona þokkalegur, hann er það á meðan ekki er þetta eilífa norðanbál sem hrjáð hefur okkur síðustu vikur.

Var að henda inn nokkrum afmælismyndum, þær eru hér!

Vonandi hafið þið það gott í dag, það ætla ég að gera!

Sunnudagur til sigurs!

Kominn mánudagur og seinni sumarfrísvika Vals hafin. Hún verður eins og sú fyrri notuð í að vinna hér úti

Á laugardagskvöldið fór ég í afmælisveislu til Tobbu, þetta var með skemmtilegri veislum sem ég hef setið. Mikið sungið og spjallað. Kom ég ekki heim fyrr en að ganga fjögur um nóttina. Samt vaknaði ég fyrir níu í gær og um hádegisbilið komu Doddi bróðir Vals og kona hans hin rússneska Tanya. Við höfðum lofað af fara með þau í Mývatnssveitina og svo konan gæti séð eitthvað merkilegt í okkar fallega landi. Við fórum á þessa hefðbundnu túristastaði við Mývatn. Byrjuðum á að stoppa við Höfða og fórum svo í Dimmuborgir. Þar gengum við aðeins um, skoðuðum meðal annars Kirkjuna. Tanya myndaði og myndaði allt sem fyrir augu bar, en við vorum eins og asnar, gleymdum myndavélinni heima. Eftir Dimmuborgirnar fengum við okkur ofurlitla hressingu í Reykjahlíð og lá leiðin þaðan í Jarðböðin. Ég hef einu sinni farið í þetta lón og þótti það ákaflega ómerkileg reynsla. Sama var upp á teningnum núna, ég held ég muni aldrei fara aftur og verðið í lónið, litlar 1400 krónur á manninn fyrir að fá að sulla í ógeðslegu vatni. Eftir baðið keyrðum við í Námaskarð. Þá fyrst lifnaði yfir þeirri rússnesku, „þetta er Ísland“ sagði hún. Ég hins vegar velti því fyrir mér hver hafi tekið það að sér að fræða útlendinga á því að Ísland sé lítið annað en hverir? Er Ísland kynnt þannig í útlöndum? Eftir Námaskarð var rennt heim á leið. Þangað vorum við komin um hálfsjö í gærkveldi. Ég náði fréttum áður en ég sofnaði, svaf í sófanum til ellefu og í rúminu til sjö í morgun. Missti þarf af leiðandi af því þegar Ítalir fengu reisupassann.

Veðrið er yndislegt, ég ætla að skella mér út og njóta þess. Farið nú vel með ykkur!

Golf og fleira!

Loksins sól! Kominn tími til. Við vöknuðum með hröfnunum í morgun og skelltum okkur í golf inn á Þverá í bongóblíðu. Þetta er fyrsta golfferðin mín þetta sumarið, verið heldur löt og ekkert sinnt þessu áhugamáli. Valur reyndar lítið skárri, held hann hafi farið einu sinni með bróður sínum og svo núna, af sem áður var. Ég ætla ekki að ræða skorið hér, að öðru leyti en því að það var vel undir meðallagi.  Betri helmingurinn ætlaði að taka sér frí í dag frá umstanginu hér úti, en eftir golfið héldu honum engin bönd. Farinn að róta, grafa og moka. Að þessu sinni er verið að moka að pottinum, möl og sandi. Í næstu viku á Bubbi svo að leggja dekkið kringum pottinn meðan maðurinn mokar skurð fyrir frárennslið. Konan fíngerða fær líklega að sitja og horfa á.

Sólin er núna farin í felur, í bili að minnsta kosti, stefnan er á fimmtugs afmæli í kvöld. Tobba mín er fimmtug og heldur veislu á nýja pallinum sínum. Til hamingju með daginn Tobba mín, hlakka til að tjútta með þér og fleirum í kvöld!

Bleikar rósir til heiðurs Tobbu bleiku

Hitt og þetta hafast að...!

Þegar ég vaknaði loksins í morgun var maðurinn búinn að grafa allt þetta sem sést hér á myndinni til hliðar. Dugnaðurinn virðist vera að ganga frá honum á meðan letin á öll völd í mínum skrokki. Hann er þó ekki að grafa eftir gulli heldur þarf víst að leggja lagnir frá heita pottinum sem nota bene hann vildi endilega fá. Ég er því algjörlega saklaus af þessari fyrirhöfn og hef ekkert samviskubit þó blessaður maðurinn púli. Gaman væri þó ef hann kæmi niður á gullæð, eða kannske olíu, veitti ekki af því í þessari dýrtíð. Meðan maðurinn leggur sig allan fram í skurðarvinnu leik ég sæta og fína húsmóður. Baka samt ekki handa honum, fer bara í bakaríið, milli þess sem ég þurrka ryk og skúra, auk þess sem ég sest af og til við tölvuna og les um hugsanlega ísbirni á hálendinu. Er nú svo illa innrætt að ég hugsaði með mér að þessi hafi fengið nóg af gestrisni Norðlendinga og ákveðið að skella sér suður yfir heiðar, þar er nefnilega ákaflega gott fólk sem skýtur ekki ísbirni. Ein frétt í dag þótti mér best, Ronaldo fer ekki frá Man Utd, mér er alveg sama þó hann hafi gefið út einhverjar yfirlýsingar um að hann vildi fara, maðurinn á sig sko ekki sjálfur og á ekkert að hafa neitt um það að segja. Nei, nei, auðvitað er ekki gott að hugur hans sé annars staðar en hjá því félagi sem hann spilar fyrir, en þetta ræðst nú allt á haustdögum líklega.

Nú ætla ég að athuga hvort maðurinn er kominn undir stéttina hérna úti, máske ég geti fært honum eitthvað að drekka, þó ekki sé mjög heitt úti þá hitnar blessuðum við púlið.

Vonandi fer þessi föstudagur vel með ykkur öll!

Bardús!

Hér er allt við það sama má segja. Ferlíkið hefur verið tengt við vatn og var það prófað í morgun og kom þá í ljós leki við fráfallið, ekki var hann þó hættulegri en það að laga mátti með því að herða draslið aðeins betur. Nú hangir vatnið í honum og þá er bara að grafa meira og koma rörum niður svo hægt sé að láta renna úr dótinu. Máske við getum skellt okkur í heitan pott um helgina. Veitir ekki af heitum potti svo hægt sé að vera eitthvað úti, helvítis kuldinn ætlar mann lifandi að drepa, við frostmark á nóttunni og hangir í 7-8 stigum á daginn, varla það þó þar sem brjáluð norðanáttin kælir mikið.

Ég hef haldið mig að mestu til hlés þegar kemur að smíðum og pípulögnum en notaði tækifærið og verslaði eitt stykki rúm, meðan bóndinn lá undir ferlíkinu hér úti. Bubbi á afmæli í desember og þá eru líka jólin svo ákveðið var að kaupa jóla- og afmælisgjöf handa einkasyninum núna, ekki ráð nema í tíma sé tekið, spurning hvort við verðum ekki búin að gleyma þessu í desember og dekurrófan græði aðeins. Blessaður unginn ætti að sofa vel í nótt.

Verð að þjóta, heimsent rúm kallar, yfir og út!