Helgin á enda!

Helgin hefur að vanda farið vel með okkur í Stafholtinu. Við hjónin fórum í gær í ýmsar verslanir sem selja ljós. Okkur vantar nefnilega ljós ofan við vaskinn í eldhúsinu. Auðvitað fundum við ekkert sem okkur líkaði eða að það sem okkur líkaði var langt yfir því verði sem við gátum hugsað okkur að greiða fyrir jafnómerkilegan hlut. Þegar við komum heim biðu okkar góðir gestir. Addi var mættur með krakkana sína þrjá. Auður Sif átti afmæli og þar sem ég var ekkert búin að kaupa handa henni tók ég hana bara með á Glerártorg og lét dömuna velja sér. Strákarnir skoðuðu í Tojsarös á meðan við skelltum okkur í fatabúð. Eftir það fór Addi með þau tvö eldri á tónleika inni í Laugarborg, en Steinar Adolf er að læra á gítar og var því að spila. Við Pétur Þór höfðum það gott hér heima á meðan. Ég hafði tekið gardínur frá stofugluggum og sett í þvottavél. Herramaðurinn litli lék sér á meðan ég þreif gluggana, straujaði gardínurnar og hengdi upp. Við vorum sko í mömmó, hann var pabbinn, ég mamman og einhver tuskuhundur var barnið. Pabbinn hugsaði sko um barnið á meðan mamman þreif og straujaði. Klukkan var að verða fimm í gærdag þegar þessi yndislega fjölskylda hélt heim á leið. Alltaf gott að fá góða gesti. Doddi og Tanya litu líka til okkar í gærdag og buðum við þeim að koma um kvöldið í pottinn sem þau þáðu. Tanya dýrkar að fara í heitt vatn og finnst alveg merkilegt að við skulum geta þetta. Heitt vatn er svo dýrt í Rússlandi.

Við vöknuðum seint í morgun og eftir kaffisopa og kíkk í blöðin fórum við á Glerártorg, ég að kaupa mér kerti og jólakort, Valur til að skoða verð á jólaseríum. Eftir það renndum við í Europris og Bónus. Húsmóðirin steikti svo kleinur sem runnið hafa ljúflega niður í fjölskyldumeðlimi í dag, alla nema kettina. Dagur er að kveldi kominn og helgin á enda runninn, fæðingardagur pabba og ömmu, 95 ár frá fæðingu pabba og 123 ár frá því amma fæddist í Fnjóskadal.

Með von um að kvöldið verði ykkur öllum indælt og vinnuvikan góð, farið vel með ykkur

Athugasemdir

[Birna Dúadóttir, 9.11.2008 kl. 18:42]

Flott helgi hjá þér

[Sigríður Jóhannsdóttir, 9.11.2008 kl. 19:58]

Svo sannarlega, strax farin að bíða eftir næstu

[Guðrún Jónína Eiríksdóttir, 9.11.2008 kl. 22:05]

Reglulega ljúf helgi, kvitt og knús.

[Jónína Dúadóttir, 9.11.2008 kl. 22:25]

Flott

[Hóffa (IP-tala skráð) 10.11.2008 kl. 18:07]

Svona eiga helgar að vera 

[Sigríður Jóhannsdóttir, 10.11.2008 kl. 20:46]

Langt síðan ég hef bara slakað á heila helgi, yfir vetrartímann. Blessaðir ungarnir mínir skildu ekkert í letinni í kennaranum, ekkert búinn að fara yfir neitt af því sem skilað var á föstudag. Blessuð börnin halda að ég eigi mér ekkert líf, eða réttara sagt að þau og þeirra nám sé lífið mitt (alls ekki þeirra, kemur þeim sko ekkert við). Yndislega sjálfhverfir en indælir unglingarnir okkar

[Birna Dúadóttir, 10.11.2008 kl. 20:52]

Þau eru alveg yndisleg þessi blessuð börn,nafli alheimsins

[Sigríður Jóhannsdóttir, 10.11.2008 kl. 21:04]

Já og verða meiri naflar eftir því sem þau stækka, mér finnst unglingar æðislegir

[Jónína Dúadóttir, 10.11.2008 kl. 21:56]

Sammála, þeir eru yndislegir